TAFSIRI KUHUSU WANA WA MUNGU NA BINTI ZA WANADAMU (MW.6:1-4)

Bishop Sylvester Gamanywa

Heri ya Mwaka mpya. Namshukuru Mungu kwamba ameturehemu na kuturuhusu tuendelee kuwasiliana katika Mwaka huu wa 2017. Mwaka jana nilipomaliza mada ya uzao wa nyoka na uzao wa mwanamke niliahidi kukuletea mada inayohusu tafsiri ya “wana wa Mungu na binti za wanadamu katika Mwanzo 6:1-4. Nimeona nitimize ahadi yangu mwanzoni mwa mwaka huu kabla ya mada nyingine. Ni matumaini yangu utajifunza kitu kipya kupitia mada hii tata: Karibuni sana:

MAANDIKO YA MJADALA

"Ikawa wanadamu walipoanza kuzidi usoni pa nchi na wana wa kike walizaliwa kwao, wana wa Mungu waliwaona hao binti za wanadamu ya kuwa ni wazuri; wakajitwalia wake wo wote waliowachagua. BWANA akasema, Roho yangu haitashindana na mwanadamu milele, kwa kuwa yeye naye ni nyama; basi siku zake zitakuwa miaka mia na ishirini. Nao Wanefili walikuwako duniani siku zile; tena, baada ya hayo, wana wa Mungu walipoingia kwa binti za wanadamu, wakazaa nao wana; hao ndio waliokuwa watu hodari zamani, watu wenye sifa." (MWA.6:1-4)

Katika maandiko haya ziko kambi mbali mbali za malaika ambazo zinakinzana kuhusu habari za "wana wa Mungu"; "binti za wanadamu", na "Wanefili"!

Hata hivyo katika mada hii nitazichambua kambi mbili kubwa na kutoa ufahamu wangu kwa kadiri ninavyo yafahamu maandiko kuhusu maana sahihi ya mambo yanayoleta utata kwenye maandiko hayo

NADHARIA WA “WANA WA MUNGU” KUWA NI “MALAIKA WA MUNGU”

Kambi ya kwanza ya nadharia maarufu sana ni hii inayofundisha ya kwamba "wana wa Mungu" wanaotajwa kwenye MW. 6:1 ni "malaika wa Mungu walioasi" kwa “kuacha enzi yao” na kuamua kuoana na "binti za wanadamu" ambapo matokeo yake ni kuzaa "watoto wa kinefili au wanefili". Nukuu za maandiko yenye kutumiwa na Nadharia hii kutetea madai ya "wana wa Mungu" kuwa ni "malaika wa Mungu walioasi” ni kama ifuatavyo:

Ayub1:6-7; "Ilikuwa, siku moja ambayo hao wana wa Mungu walikwenda kujihudhurisha mbele za BWANA, Shetani naye akaenda kati yao. BWANA akamwuliza Shetani, Umetoka wapi wewe? Ndipo Shetani akamjibu BWANA, na kusema, Natoka katika kuzunguka-zunguka duniani, na katika kutembea huku na huku humo."

Ayub 2:1: "Tena kulikuwa na siku hao wana wa Mungu walipokwenda kujihudhurisha mbele za BWANA, Shetani naye akaenda kati yao, ili kujihudhurisha mbele za BWANA."

Yud.1:6 "Na malaika wasioilinda enzi yao wenyewe, lakini wakayaacha makao yao yaliyowahusu, amewaweka katika vifungo vya milele chini ya giza kwa hukumu ya siku ile kuu."

Hayo ndiyo Maandiko maarufu yanayotumika kutetea nadharia ya "wana wa Mungu" kuwa ni "malaika wa Mungu walioasi" na kwamba Mungu aliamua kuwafungia kuzimu kwa "kushindwa kulinda enzi yao"!

NADHARIA YA “WANA WA MUNGU” NI BINADAMU WA “UKOO WA SETHI”

Kambi ya pili ya “nadharia pinzani” na maarufu katika mjadala huu yenyewe inafundisha ya kwamba, "wana wa Mungu” waliotajwa katika MW.6:1 “sio malaika wa Mungu walioasi” bali ni binadamu wa ukoo wa Sethi ambaye ndiye chumbuko binadamu walipoanza kuliitia jina la BWANA

Nadharia hii inapinga dhana ya "wana wa Mungu" kuwa si malaika walioasi kwa sababu Yesu alisema "malaika hawaoi"! MT: 22:30-31;

UCHAMBUZI WANGU KUHUSU MW:6:1-4

Kama ilivyo kawaida yangu, kabla ya kuwasilisha uchambuzi wangu, kwenye mijadala tata kama hii huwa sifuati mkumbo wa kinadharia wa “wengi wako wapi” bali "kweli ni nini na iko wapi"! Kwa hiyo mimi nami nimefanya utatifi binafsi wa kimaandiko pamoja na kuchunguza misamiati ya maneno yaliyotumika katika mukhtadha wa kile mwandishi wa Kitabu cha Mwanzo alichokuwa anakilenga kuhusu historia ya binadamu.

Baada ya kujiridhisha ndipo nilifikia kukubali kwamba "wana wa Mungu" waliotajwa katika Mw. 6:1 sio "malaika wa Mungu walioasi"; na nukuu za "wana wa Mungu" kuwa ni "malaika wa Mungu" katika Ayub 1:6:2:2 hayana uhusiano na Mw 6:1 na nukuu za maandiko ya Yuda kuhusu “malaika walioiacha enzi yao (Yud.1:6) haikulenga kisa cha Mw.6:1

UTETEZI WANGU KUHUSU "WANA WA MUNGU" SI "MALAIKA WA MUNGU WALIOSI"

Nianze kwa kusema ya kwamba Mwandishi wa Mw.6:1 ambaye ni Musa hakutoa hii tafsiri ya kwamba hao aliowataja kuwa ni "wana wa Mungu" kuwa ni "malaika wa Mungu"! Kwa hiyo, madai ya wana wa Mungu ni "malaika ni dhana ya kufikirika"!

Nilipochunguza kwa makini mukhtadha wa mwandishi wa kitabu cha Mwanzo niligundua kilicholengwa sio "uasi wa malaika" bali ni "uasi wa binadamu" kwa sababu zifuatazo:

i) Malaika kwa asili hawana jinsia ya kuoa na kuolewa inayowaruhusu “kujitwalia wake wo wote waliowachagua..” Maneno haya yanawahusu binadamu ambao wana maumbile na uhuru wa kuchagua kuoa.

ii) Ghadhabu ya Mungu haikuwalenga haiwalengi "malaika" bali "binadamu": "....Roho yangu haitashindana na mwanadamu kwa kuwa naye ni nyama....". Hakuna mantiki makosa wafanye “malaika wa Mungu” halafu ghadhabu ya Mungu iwashukie wanadamu ambao kimsingi wao ndio waathirika wa kuingiliwa kingono na malaika hao.

Ushahidi mwingine mzito wa kimaaandiko unaonishawishi nikubali kwamba "wana wa Mungu" waliotajwa katika Mw.6:1 sio "malaika wa Mungu walioasi" ni haya yafuata:

"Kwa maana alimwambia malaika yupi wakati wo wote, Ndiwe mwanangu, Mimi leo nimekuzaa? Na tena Mimi nitakuwa kwake baba, Na yeye atakuwa kwangu mwana? Hata tena, amletapo mzaliwa wa kwanza ulimwenguni, asema, Na wamsujudu malaika wote wa Mungu. Na kwa habari za malaika asema, Afanyaye malaika wake kuwa pepo, Na watumishi wake kuwa miali ya moto. Lakini kwa habari za Mwana asema, Kiti chako cha enzi, Mungu, ni cha milele na milele; Na fimbo ya ufalme wako ni fimbo ya adili." (EBR. 1:5-8)

Kwa maandiko haya tunathibitisha ya kwamba "hakuna mahali popote" katika maandiko ambapo "Mungu amemtakia na kumteua malaika yeyote kuwa ni mtoto wake"!

Badala yake tunasoma ya kwamba Mungu amewaumba malaika katika asili ya kuwa viumbe wa kiroho (si kama wanadamu wenye miili ya kuoa na kuolewa); na nafasi yao mbele za Mungu ni "watumishi wake tu"!

Utetezi wangu wa pili ni wa maneno ya Yesu mwenyewe pale aliposema "...katika kiyama ya wafu watu hawaoi wala kuolewa bali huwa kama malaika mbinguni.." (MT.22:30-31)

Japokuwa katika mukhtadha wa maandiko Yesu alikuwa akibanisha ya mbinguni hakuna kuoa na kuolewa kama duniani; bado mfano kuhusu "malaika wa mbinguni" kuwa hawaoi ni ushahidi ya kwamba malaika hawakuumbwa na miili yenye jinsia yoyote ya kike wala kiume!

Utetezi wangu mwingine ni kukanusha maandiko ya "malaika ambao walishindwa kulinda enzi yao...." kwenye waraka wa Yuda (Yud.1:6) kuyahusisha maandiko haya na kisa cha Mw 6:1 ni kutoka nje ya maana yake halisi! Yuda alilenga “tukio la uasi wa Shetani na malaika zake mbinguni ambao dhambi yao haikuwa mambo ya zinaa za kibinadamu.

WANEFILI SIO UZAO WA NDOA ZA MALAIKA NA BINADAMU

Msamiati wa neno “wanefili uliotajwa kwenye Mw.6:4 halisemi ya kwamba wamezaliwa kutokana na ndoa kati ya malaika na binti za wanadamu. Andiko linasema: “Nao wanefili walikuwako duniani siku zile;….” Sio walizaliwa wakati huo.

Pili, watoto waliozaliwa kwenye uasi huo imeandikwa “…hao ndio watu hodari zamani, watu wenye sifa…” Hawa ni tofauti kabisa na wanefili. Isitoshe yako maandiko mengine yanayotaja wanefili ambao ni uzao wa binadamu na sio wa malaika (Hes.13:33)

MAJUMUISHO KWA SEHEMU YA KWANZA

Katika sehemu ya kwanza ya mada hii, nimejaribu kufafanua kwa kiasi nilichojaliwa kuonyesha ya kwamba, “wana wa Mungu” ambao wametajwa katika Mw.6:1-4 sio “malaika wa Mungu walioasi” kama ambavyo imetafsiriwa na kuwaminiwa. Vigezo vya utetezi ni kutokuwepo kwa tafsiri ya moja kwa moja kimaandiko kwamba “wana wa Mungu” hao walikuwa “malaika wa Mungu.” Hoja ya msingi hapa ni hukumu ya Mungu ingelitolewa kwa malaika walioasi badala ya binadamu.

Pili, Malaika kwa asili hawana maumbile wala uwezo wa kuoa na kuzaa kama binadamu na viumbe hai wengine duniani. Mbinguni hakuna kuoa wala kuzaana kama duniani(MT.22:) Tatu, Maandiko yanasema waziwazi ya kwamba Mungu hajatoa hadhi wala kutamka kwamba “malaika ni watoto wake”.

Mwisho ndoa zilizofanyika hazijazalisha watoto wa kinefili na badala yake wanefili wenye walikuwepo kabla na wakati ndoa hizo zinafanyika kwa wakati huo. Sehemu ya pili inayofuata nitafafanua hao wana wa Mungu katika Mw.6:1-4 ni akina nani na ushahidi kamili wa maandiko yenye kuthibitisha uchambuzi wangu. Kama umesoma ujumbe huu nijulishe kwa ku-like na warushie na marafiki zako. NAKUTAKIA BARAKA ZA MWAKA MPYA 2017

• Tweet
• Share
• Share
• Share
• Share

Sign up here with your email